|
|
Ovverdainst insteld (9: 1-10:20)
|
Leviticus 09
01Op aachtste dag raip Mozes Aäron mit zien zeuns, en oldsten van Israël.
02Hai zee tegen Aäron: "Hoal n bolkaalf veur t zuvernsovver en n jonge ram veur t brandovver, daaiern zunder lek of brek, en breng ze noar soamenkomsttènt tou.
03Zeg tegen Isrelieten: 'Hoal n bok veur t zuvernsovver, en n bol en n ram veur t brandovver, baaident van ain joar en zunder lek of brek.
04Hoal n bol en n ram dat ie ze as vree-ovver de HEER aanbaiden, en ook n mit eulie toumoakt koornovver. Want vandoag zel de HEER aan joe verschienen.'"
05Ze deden wat Mozes besteld haar en brochten ovvers noar soamenkomsttènt tou. Dou stelde haile gemainschop zok op veur de HEER.
06Mozes zee: "Dit is wat de HEER joe besteld het om te doun, dat zien heerlekhaid aan joe verschienen zel."
07Tegen Aäron zee Mozes: "Goa op dien stee stoan bie t altoar en droag t zuvernsovver en t brandovver op om t veur die zulm en t volk te verzoenen. Droag den t volk heur ovvers op om der veur heur verzoenen over te doun, krekt as de HEER besteld het."
08Dou ging Aäron noar t altoar tou en slachtte bolkaalf dij bestemd was veur zien aigen zuvernsovver.
09Zien zeuns langden hom t bloud aan. Hai stipte zien vinger in t bloud en streek dat aan hoorns van t altoar. Wat ter van t bloud overbleven was, goot hai aan vout van t altoar oet.
10 t Vet, nieren en lutjeste kwaab van lever van t zuvernsovver, dee e op t altoar in rook opgoan, krekt as de HEER Mozes besteld haar.
11 t Vlaais en hoed braandde hai boeten legerkaamp op.
12 Dou slachtte hai ram veur t brandovver. Zien zeuns langden hom t bloud aan en hai sprenkelde t tegen aal kanten van t altoar aan.
13 Ze langden hom ook stokken vlaais en kop van t ovverdaaier aan en hai dee ze op t altoar in rook opgoan.
14 Hai wosk ingewanden en poten en dee dij mit wat ter van t ovverdaaier overbleven was, in rook opgoan.
15 Aäron luit dou t volk heur ovvers brengen. Hai slachtte bok veur t volk heur zuvernsovver en druig hom op aigenste menaaier op as zienent.
16 Hai luit daaiern veur t brandovver brengen en ovverde heur op veurschreven menaaier.
17 Dou luit e t koornovver brengen en dee der n haandvol van op t altoar in rook opgoan. Dit ovver ging boeten t mörgenbrandovver om.
18 Op t lest slachtte hai bol en ram veur t volk heur vree-ovver. Zien zeuns langden hom t bloud aan, en hai sprenkelde t tegen aal kanten van t altoar aan.
19 Vedde dailen van bok en ram, dat is te zeggen: steert en ale netvet, nieren en lutjeste kwaab van lever,
20 legden ze bie bòrst, en Aäron dee t vet op t altoar in rook opgoan.
21 Daaiern heur bòrst en rechterachtervörrel stook e veur de HEER omhoog, krekt as Mozes besteld haar.
22 Dou spraaidde hai handen oet over t volk en zegende t. Noadat Aäron ovvers opdroagen haar, kwam e van t altoar noar beneden,
23 en ging mit Mozes in soamenkomsttènt. Dou ze weer noar boeten kwammen, zegenden ze t volk. Doarop verscheen aan aal t volk de HEER zien heerlekhaid.
24 n Fèlle vlam kwam tou t haailegdom oet en verteerde t brandovver en t vet op t altoar. Dou t volk dat zag, begunden ze te joechaaien en elk luit zok plat veurover valen.
|
Leviticus 10
01Aäron zien zeuns Nadab en Abihu deden glìnne kolen in heur wierookschoal en legden der roekerij op. Mor t was verkeerd vuur dat ze de HEER aanbaiden wollen, vuur dat nait voldee aan de HEER zien veurschriften.
02n Fèlle vlam kwam tou t haailegdom oet en verteerde heur. Doar, veur de HEER, kwammen ze om.
03Mozes zee tegen Aäron "Dit mainde de HEER dou e zee: 'Deur dijent dij mie noastoan, loat ik mien haaileghaid zain. t Haile volk moak ik getuge van mien heerlekhaid.'" Aäron dee t swiegen der tou.
04Mozes raip Misaël en Elsafan, zeuns van Uzziël, Aäron zien oom. "Kom ais hier", zee e, "en droag joen bruiers bie t haailegdom vandoan en breng heur boeten legerkaamp."
05Ze druigen heur, mit heur tuniek nog aan, tou legerkaamp oet, zo as Mozes heur besteld haar.
06Mozes zee tegen Aäron en zien zeuns Eleazar en Itamar: "Ie maggen joen hoar nait lös hangen loaten en joen klaaier nait scheuren. Aans is t doan mit joe en zel de HEER zien gram tegen haile gemainschop lösbranden. Mor joen bruiers, aander Isrelieten, maggen wel hoelen en kloagen over t vuur dat de HEER aanstoken het.
07Omdat ie zaalfd binnen mit de HEER zien eulie, mag ie nait bie ingang van soamenkomsttènt vandoangoan, aans is t doan mit joe." En ze deden wat Mozes heur besteld haar.
08Dou zee de HEER tegen Aäron:
09"Doe en dien zeuns maggen gain wien of staarke draank drinken eerdat ie noar soamenkomsttènt tou kommen, aans is t doan mit joe. Dizze bepoalen blift veur joe en joen noazoaten veur aiweg en aaid gelden.
10 Ie mouten onderschaaid moaken kinnen tussen wat haaileg is en wat onhaaileg, tussen wat zuver is en wat onzuver.
11 En ie mouten Isrelieten oetleg geven over bepoalens dij Mozes joe zegd en de HEER hom besteld het."
12 Mozes zee tegen Aäron en zien overbleven zeuns, Eleazar en Itamar: "Wat of ter overbleven is van t koornovver dat de HEER aanboden is, mag ie zunder gèst opeten noast t altoar, want t is alderhaailegst.
13 Ie mouten t eten op n haaileg stee. t Is veur joe en joen zeuns as joen aandail in ovvergoave veur de HEER. Zo is mie t besteld.
14 Mor bòrst en rechterachtervörrel magstoe en dien zeuns en dochters op elk zuver stee eten. Ze binnen veur die en dien kinder as joen aandail in Isrelieten heur vree-ovvers.
15 Isrelieten mouten, behaalve vedde dailen, rechterachtervörrel en bòrst ook noar de HEER brengen, en dij mouten veur de HEER omhoogstoken worden. Veur aiweg en aaid binnen ze veur die en dien zeuns. Zo het de HEER ons t besteld."
16 Dou ging Mozes overaal noavroag doun noar bok dij as zuvernsovver aanboden was, mor dij bleek opbraand te wezen. Vergrèld vruig Mozes aan Eleazar en Itamar, Aäron zien zeuns dij overbleven wazzen:
17 "Woarom heb ie t vlaais van t zuvernsovver nait opeten op n haaileg stee? t Is ja alderhaailegst. De HEER het t aan joe geven om t volk zien schuld weg te nemen en veur heur verzoenen te doun.
18 t Ovverdaaier zien bloud was ja nait in t haailegdom brocht, dat zodounde haar ie t vlaais in elks gevaal in t haailegdom opeten mouten. Zo haar ik joe t ja besteld."
19 Aäron zee tegen Mozes: "Mien zeuns hebben vandoag heur zuvernsovver en heur brandovver de HEER aanboden. Mor doe waist wat mie vandoag overkommen is. As ik vandoag van t vlaais van t zuvernsovver eten haar, zol de HEER dat den goudvonden hebben?"
20 Dou Mozes dit heurde, was hom t goud.
|
|
